Guollediggi Iešjávrris

1. bilde

Gulustuvai miehtá duottarjávrriid Finnmárkkus ahte olbmot oggot gilvvu. Finnmárkku duoddara jávrriid guolit dáhtto doallat guolledikki. Guolit mearridedje doallat dikki Iešjávrris.

Juohke guollešládja oaččui sáddet ovtta guoli diggái.

2. bilde

Dikkis leat: hávga, luossa, dápmot, vuskkon, hárri, čuovža ja rávdu.

3. bilde

Luossa: Mun áiggun leat oaivámuš, danin go mun lean losimus buot guliin mat leat Finnmárkku jogain ja jávrriin.

4. bilde

Buot eará guolit oktii njálmmiid:

Juo, du mii válljet oaivámužžan, danin go don leat ávkkálaš guolli. Čáppat ja šealgat leat don maiddái. Don leat maid hui siivui. Don it goassege soardde min earáid.

5. bilde

Luossa:

Mun dáhtun gal midjiide vel nubbinoaivámučča, danin go mun orun mearas measta olles jagi.

6. bilde

Hávga:

Mun háliidan leat Guolledikki nubbinoaivámuš. Mus leat bastilis bánit, nu ahte sáhtán skuvlet hilbes guollečivggaid. Ii ge das galle, dii fertebehtet muitit ahte mun lean nubbin stuorámus guolli dás.

7. bilde

Dápmot:

Ii nu gal. Mun gal in leat ovtta oaivilis diesa. Hávga lea váralaš boraguolli. Eat go mii vállje siivos borranguoli Guolledikki nubbinoaivámužžan?

8. bilde

Hávga:

Maid don dál dájut, Dápmot? Mun dat goit lean borranguolli. Álohii mu dahket hávgagáhkkun! Olbmot han ballet mu bastilis bániin. Veahá ávki goit orru mu bastilis bániin.

9. bilde

Čuovža:

Addet munnje sáni saji! Mun siđan rávddu Guolledikki nubbinoaivámužžan.

10. bilde

Buot eará guolit earret Hávga:

Juo, juo! Mii sihtat rávddu Guolledikki nubbinoaivámužžan.

11. bilde

Luossa:

Dalle mii leat ovtta oaivilis. Mii leat válljen rávddu Guolledikki nubbinoaivámužžan.

Dál mii fertet bargagoahtit. Vuosttaš áššis fertet mearridit gos guhtege guolli galgá orrut. Juohke guolli galgá dál muitalit gos liiko orrut.

Mun sáhtán álgit: Mu riegádanbáiki lea sáivačáhci, ja doppe lean orron álgo golbma jagi. Mu rievttes ruoktu lea mearra. Mearas mun gávnnan borramuša ja buoidudan iežan. Buot suohttaseamos lea mu mielas jogain. Go garra rávdnji lea jogain, de mun njuikkodan ja báŋan vaikko máŋga mehtera áibmui.

12. bilde

Dápmot:

Vuoi, vuoi datte. Guđiin jogain don liikot orrut?

13. bilde

Luossa:

Mun go? Na, gal dii dan diehtibehtet ahte mun dat gal liikon orrut buot eanuin ja ollu jogain Finnmárkkus. Álttá eanu rájes gitta Vuorjánjoga rádjái nuortan. Lean veahá hárbman dainna go in beasa eatnoráigge Guovdageidnui Čávžžu badjel, ja guhkin eret dál go leat buđđon eanu.

14. bilde

Hávga:

Sihke olbmot ja guolit leat viggan mu ádjit eret Finnmárkkus, muhto muinna gal eai birge, dan mun gal dajan!

Dál lean fargga vuoitán juohke sajis. Eanemusat liikon orrut coages, loika jávrriin main lea ollu suoidni ja bodnerássi, muhto birgen mun gal juohke sajis gos lea čáhci ja dan meare guolit ahte in nealggo.

15. bilde

Rávdu:

Mun gal baicca lean dat vuosttaš sáivaguolli mii Finnmárkui bođii. Dat čáhci gos mun galggan orrut, galgá leat galmmas, muđui mus šaddet nu nahkárat. Garra rávdnjái mun in gal liiko.

16. bilde

Čuovža:

Mun ieš gávdnon measta buot Finnmárkku jogain. Leavdnjajohkii ja Rávttošjohkii mun in leat vel ollen. Muđui mun gal orun olu dain stuora jávrriin Idjajávrris gitta Stuorajávrái. Merrii mun in gal liiko. Mearas lea nu ollu sálti.

17. bilde

Vuskkon:

Mun gal čuvodan Hávgga, muhto in leat gal nu searra goržžis go son.

Dalle láven ge bidjalit smávva jávrriide gosa hávga gal ii beasa.

18. bilde

Hárri (suovvil):

Mu mielas lea suohttaseabbo orrut jogain go jávrriin. Liikon mihá buorebut čiekŋalis jávrriide go coages jávrriide. Muhtun siivos guollebivdi attii munnje sáhtu Kárášjogas Láhpojávrái. Lean nu giitevaš dien guollebivdái go dál lea mus nu buorre dilli Nieidagoržžis Guovdageainnueanus.

19. bilde

Luossa:

Mu sohka lea mearas, muhto munnje lea buoret orrut sáivačázis. Mađi čiekŋalit čáhci, dađi buoret dat lea munnje ruoktun. Mu veajehat gal baicca liikojit coages čázis orrut, muhto eai veajehat leat nu jierbmát go mii ollesšaddan guolit.

20. bilde

Dápmot:

Muinna gal ii leat nu váralaš, danin go mun gal orun juohke sajis. Váivi lea gal go olusat mu doarrádallet. Hávga lea hirbmat nealggas, ja álohii mu ogohallá. Dál mun lean boahtán dán diggái bivdit hávgga addit munnje ráfi. Mun lean báhtaran dain jávrriin ja jogain gos ovdal lean orron. Hávga ja olbmot leat mu baldán eret. Olbmot gal leat dál buorránan, muhto hávga gal lea nu vearrái mu doarridit. Mu vilbeliin, geat orrot mearas, lea mihá buoret dilli go mus.

21. bilde

Hávga:

Na maid don ges váidalat mu ala duššiid?

Mun goit ferten maid eallit. Gula maid, Dápmot! Don gal it galgga olus jietnadit maidege. Mun dat gal boran stuora guliid, muhto don veajetriebuid doarridat ja soarddát. Dat go orru buoret du mielas? Mu mielas goit dat lea máilmmi heajumus vierru dus, Dápmot! Jurddašehket mat: Dápmot ogohallá veajehiid!

22. bilde

Luossa:

Gullet mat. Eat mii gille suhtadit gal Guolledikkis. Mii fertet gal geahččalit iežamet ránnjáiguin soabadit ja diktit sin ráfis orrut. Dat guolit geat sáhttet eallit širráiguin, divrriiguin ja šattuiguin, galget birget daiguin.

Muđui mii jávkadit nubbi nuppi. Ammat olbmot juo gilvvu bivdet min.

23. bilde

Vuskkon:

Mun gal lean ovtta oaivilis min guolledikki oaivámuččain, luosain. Mii eat ábut nubbi nuppi borragoahtit dáppe Finnmárkku duottarjávrriin. Ja aistton gal: buotlágan vearjjuid geavahit olbmot min vuostá.

24. bilde

Luossa:

Mii, guolit, fertet dál váruhit firpmiin, nuhtiin, vuokkain ja dolgevuokkain. Mii eat ábut fillehallat sevttiide ja šealgu diŋggaide. Go olbmot bohtet jávregáttiide, johkagáttiide, mearragáddái ja jieŋaid ala oaggunstákkuiguin ja uštagiiguin, de fertet báhtarit nu bures go sáhttit. Jus fal olbmo mánát min oggot, de mii gal fertet fillehallat dohppet sin vuokkaide, danin go lea dearvvašlaš min borrat.

25. bilde

Hávga:

Na juo, dalle mii várra leat geargan dáinna guolledikkiin dán hávvái?

Mus gal šattai borranmiella. Háliidivččen vuodjalit borramuša ohcat.

26. bilde

Luossa:

Mun maid jáhkán Guollediggi leat nohkan dán hávvái. Gii báhcá mis deike Iešjávrái?

27. bilde

Dápmot, rávdu ja hávga:

Mii báhcit Iešjávrái. Mii oaidnalit boahtte jagi fas Guolledikkis.

Mannet dearvan!

28. bilde

Luossa, čuovža, hárri ja vuskkon:

Báhcet dearvan! Mii oaidnalit boahtte jagi fas Guolledikkis.

Vuosttaš govva: © Wikimedia CC/Ragsu
Digitála govat: © Liisa Helander